आध्यात्मिक सेलिब्रिटी सद्गुरु र फिल्म अभिनेता राजेश हमाललाई दर्शकले अब एउटै स्क्रिनमा हेर्न पाउने भएका छन् ।
भारतीय योग तथा आध्यात्मिक गुरुको निम्तोमा हमाल भदौ ९ गते भारतको तमिलनाडुस्थित कोइमबतुर प्रस्थान गर्नेछन् जहाँ उनले सद्गुरुसँग टक शो गर्नेछन् । यो प्रतीक्षित टक शो सद्गुरु आश्रममा हुनेछ ।भदौ ११ गते छायांकन हुने टक शोमा हमाल र सद्गुरुबीच नेपाल र भारतबीचको मित्रता, संस्कृति र अध्यात्म लगायत विषयमा कुराकानी हुनेछ । भीवाईएफ टक शोले योसँगै वैश्विक सेलिब्रिटीसँग ‘कन्भर्सेसन’ पनि थालनी गर्दैछ ।यो संवाद यात्राको सुरुवात हमाल र सद्गुरुबाट हुन लागेको भीवाईएफका प्रमुख दशरथ सुनारले जानकारी दिए । हमालले गत महिना काठमाडौंमा भीवाईएफ फिल्म स्कुल तथा कलेजको पनि उद्घाटन गरेका थिए ।
