२०८१ श्रावण ६, आईतवार

उद्योग वाणिज्य संघले गरे यस्ता काम !

२०८१ असार १०, सोमबार
पढ्ने समय : 2 मिनेट

उर्लाबारी, १० असार/उर्लाबारी उद्योग वाणिज्य संघ सधैं उद्योगी व्यपारीहरुको हितमा क्रियाशिल रहेको अध्यक्ष शेरबहादुर भण्डारीले बताएका छन् ।

अध्यक्ष भण्डारीले सोमबार आयोजित पत्रकार सम्मेलनमा संघले गरेका कामका बारेमा बुँदागतरुपमा सुनाउँदै आर्थिक मन्दीका कारण धरायसी उद्योगी व्यापारीहरुको समस्याका बारेमा तीनै तहका सरकारको ध्यानाकषर्ण गराइएको दाबी गरे ।

तेइस बुँदामा तयार पारिएको संघको कामको विवरणमध्ये पुँजीका आधारमा स्थानीय कर निर्धारण गर्नुपर्छ भनी नगरपालिकाको ध्यानाकषर्ण गराउँदा कर घटाइएको अध्यक्ष भण्डारीले बताए ।

उपभोक्ता नठगिउन भनेर गुणस्तर तथा नापतौल विभाग मार्फत् नियमित ढक तराजु चेकजाँच गरिनुका साथै साना व्यवसायीहरुका लागि प्रत्येक आर्थिक वर्षको भदौमा करको आय विवरण भरी कर चुक्ता प्रमाणपत्र उपलब्ध गराउँदै आएको भण्डारीले जानकारी दिए ।

आर्थिक मन्दीको समयमा समेत बैंकले मनपरी ढंगले व्याजदर बढाउदा संघले सशक्त विरोध जनाएको थियो । धितो लिलामी प्रक्रियालाई रोक्न बैंक तथा वित्तिय संस्थाहरुलाई ज्ञापनपत्र दिइएको र स्थानीय सरकारलाई घर बाटो सिफारिस नगर्न पत्रचार गरिएको भण्डारीले उल्लेख गरेका छन् ।

गत वर्षको लक्ष्मी पुजाका रात उर्लाबारी–७ का दिपक कार्कीको पसलमा आगलागी हुँदा त्यस घटनमा परी मृत्यु तथा घाइते भएका व्यक्तिका परिवारलाई ३२ हजार रुपैयाँका दरले स्वेच्छिक सहयोग संकलन गरी राहत वितरण गरिएको उनले बताए ।

पत्रकार सम्मेलनमा संघका पूर्व अध्यक्ष प्रितम खड्गीले विद्यमान समस्याका रुपमा रहेको घरवहाल कर सुधारका लागि प्रयास गरिएको तर अझैपनि सोचेअनूरुप सुधार नभएको बताए ।

प्रतिक्रिया दिनुहोस

सम्बन्धित समाचार